“Ko ñomongeta mburuvicha ndive rojapo rohesa’ỹijo haĝua tembiaporã jeporavo rehegua, ojeguerekóvo tesarenondépe 21 jasyrandy ko ary oúvape oikova’erã mburuvicharã jeporavo, ha upéva mboyve oikova’erã jeporavo partido-kuéra apytépe 9 jasypakõi guive 20 jasyteĩ meve”, he’i Ramírez Zambonini, marandu myasãiharakuérape.
“Ko’áĝa ore rohenóita umi partido politico-guápe oiporavo haĝua arange ojapótavape jeporavo ijapytepekuéra, pe arange léi electoral he’iha ryepýpe”, ombojoapy. Omotenondema voi he’ívo jeporavo ojejapóta kuatia rupive ha ndojeipiru moái ojeheróva urna electrónica-kuéra.
Ojeguerekómagui araka’etépa ojejapóta jeiporavo, omomba’e guasu ikatutamaha oiporavo avei 20 su ñane retã memby oikóva ambue tetãme.
3.500.000 tapicha ikatútava oiporavo
He’i ohesa’ỹijo hague avei Mburuvicha ndive, máva mávapa oĩ térã oĩta pe téra rysýi ojeheróvape padrón. “Ko’áĝaite ramo oiméne oĩ 3.300.000 tapicha, ha pévape ñambojoapyva’erã 20.000 oikóva ambue tetãme, avei umi pyahu ombotýtava 18 ary aguive, 2.013 peve ha oguerekóva hóga renda, ha péicha pya’e pya’e, roguenohẽ 150.000, he’i”.
“Avei ore roimo’ã ko’ã árape, ko arýpe, omoingéta avei héra téra rysýipe 100.000 tapicha rupi, aguive jasypo pahápeve ko arýpe, ha’éva ára ikatúvape ojejapo ko tembiapo, oiporavoséva pe jeiporavo ojapótava ijapytepekuéra umi partido politico-kuéra. Upéi ikatúta ojehai jey téra jasypápeve, oike haĝua jepooravo ojejapotava ambue arýpe mante. Ko jeporavo ojeapytepeguávape, umi omboguapyva’ekue héra 31 jasypópevente; ha upévare ore ro’e padrón ojeipurútava ary 2.013-me oguerekóne 3.500.000 tapicha réra ikatútava oiporavo.